විවේකයේ පාරාදීසය ගාලු මුවදොර

ජීවිතේ කොයිතරම් කාර්යබහුලද නේද?  සතිඅන්තයෙන් පස්සෙ ඔන්න ආයෙමත් වැඩ වැඩි සතියක් පටන් ගන්නයි යන්නේ. ඉතින් මේ සතිය අපි හැමෝම දන්න කියන තැනකින් පටන් ගන්න ඕනේ කියලා මම හිතුවා. කොළඹ අවට ඉන්න හැමෝම වගේ කෙටි නිවාඩුවක් ලැබුන ගමන් යන තැනක් ගැන තමයි අද මම ඔයාට ලියන්න හිතුවේ. ඒ වගේම පෙම් වතුන්ගේ පාරාදීසය විදියටත් මේ තැන හඳුන්වන්න පුළුවන්. ඉතින් කොයිකවුරුත් දන්න ගාලුමුවදොර පිටිය. එහෙම නැතිනම් Galleface එක ගැන නොදන්න දේවල් ටිකක් ලියන්නයි මම මේ හදන්නේ.

ගොඩනැගිලි පිරුණු කොළඹ කොන්ක්‍රීට් වනාන්තරේ මැද්දේ තියෙන විශාලතම හිස් බිම් කඩ විදියට මේ ගාලුමුවදොර පිටිය හඳුන්වන්න පුළුවන්. එක් කෙළවරක් මුහුදටත් අනෙක් පසින් ගාලු පාරටත් මායිම්ව පිහිටන මේ බිම් කඩේ සුන්දර ඉතිහාස කතාවක් තියෙනවා. අන්න ඒ ගැන තමයි අද මම ඔයාට මේ ලියන්නේ.
ගෝල්ෆේස් එහෙම නැතිනම් ගාලුමුවදොර කියන්නේ ශ්‍රී ලංකාවේ , කොළඹ තියෙන ඇවිදින්න වෙන්කරපු කිලෝමීටර් භාගයක් විතර දිග භූමියක්. Henry Ward කියන බ්‍රිතාන්‍යය ආණ්ඩුකාරවරයා තමයි මේ භූමිය නිර්මාණය කරලා තියෙන්නේ. අශ්වයො පදින්නයි ගොල්ෆ් ගහන්නයි තමයි ඒ දවස්වල මේ බිම වෙන්කරලා තිබිලා තියෙන්නේ. අද තියෙනවට වඩා ලොකු ඉඩක් එදා තිබිලා තියෙනවා. 1856 මේ කියන ආණ්ඩුකාරවරයා මේ බිම් තීරුව කොළඹ ජීවත්වෙන කාන්තාවන්ට වගේම දරුවන්ගේ විවේකය වෙනුවෙන් වෙන්කරන බවටත් ඉදිරි පාලකයන්ගේ අනුග්‍රාහය යටතේ පවත්වාගෙන යායුතු බවත් පලකයක ලියලා පළ කරලා තියෙනවා. අද වෙද්දී ගාලුමුවදොර පිටිය හෙක්ටයාර 5ක පමණ බිමකට හිමිකම් කියනවා.එදා ගාලුමුවදොර මිනිසුන්ගේ නිදහස වෙනුවෙන් වෙන් කලාට අද ඒ නිදහස ජනතාවට ලැබෙනවාද කියන එක නම් ප්‍රශ්නයක්.

ගෝල්ෆේස් එක එදා වෙන්වුනේ කාන්තාවන්ටයි දරුවන්ටයි කියලා මම කිව්වනේ. ඒත් අද මේ ගාලුමුවදොර පිටිය වෙන්වෙන්නේ කවුරු වෙනුවෙන්ද? මෙහෙම අහපු ගමන් ඔයාට මතක් වෙන්නේ පෙම්වතුන් ආදරවන්තයින් නේද? ඒ තරමට ගාලු මුවදොර පිටිය පෙම්වතුන්ට ගහට පොත්ත වගේ බැඳිලා තියෙන දෙයක්. ඔයත් එක වරක් හරි මෙතනට ඇවිත් ගිහින් ඇති.නිකමට හිතිලා නැද්ද මේතනට මේ නම වැටෙන්න හේතුව මොකද්ද කියලා. හිතලා බලන්නකො ගාල්ලේ තියෙන්න ඕනේ ගාලු මුවදොර ඇයි කොළඹ තියෙන්නේ කියලා.ගෝල්ෆේස් කියන නම හැදෙන්න එක හේතුවක් තමයි ගෝල්ෆාස් කියන ඕලන්ද යෙදුම. ගාල්ලට මුහුණලා තියෙන තියෙන ප්‍රාකාර බැම්ම කියන තේරුම ඇතුව තමයි එහෙම යොදලා තියෙන්නේ කියලා එක මතයක කියවෙද්දී ගාල්ල ප්‍රදේශයට මුහුණලා තියෙන නිසා මෙහෙම හඳුන්වනවා කියලත් සමහරු කියනවා.ඒ වගේම ගාලුපාර පටන් ගන්නෙත් මෙතනින් හින්දා මේ නම පාවිච්චි කරනවා වෙන්නත් පුළුවන්.

අද මේ ගාලු මුවදොර විවේකය වෙනුවෙන් වෙන්වුනාට , මේ ගොල්ෆේස් එකේ අපි ආදරේ කලාට, පුංචි දරුවො සරුංගල් යැව්වට, එදා මේ භූමියේ වුන දේවල් ඔයා දන්නවද? යටත් විජිත කාලේදි මේ භූමිය පාවිච්චි කරලා තියෙන්නේ වැරදිකරුවො එල්ලලා මරණ වධක භූමියක් විදියට, ඒ වගේම අද තරු පහේ හෝටල් කීපයකින්ම වටවෙලා තියෙන මේ භූමිය එදා පෘතුග්‍රීසි, ලන්දේසි, ඉංග්‍රීසි ජාතිකයන්ගේ සොහොන් පිටියක් වෙලා තිබිලා තියෙනවා.1828 දී විතර මේ භූමිය එඩ්වඩ් බාන්ස් කියන ආණ්ඩුකාරවරයා යටතේ මේ භූමිය තුරඟ තරඟ පිටියක් විදියටත් පාවිච්චි කරලා තියෙනවා.

ඒ වුනාට හෙන්ඩ්‍රි වෝඩ් ආණ්ඩුකාරවරයා  මේ බිම කාන්තාවන්ටයි දරුවන්ගෙයි නිදහස වෙනුවෙන් වෙන්කළාට පස්සේ ඉඳන් අද වෙනකන්ම  අපේ විවේකය වෙනුවෙන් මේ බිම වෙන්වුනා.

ඖෂංගි ගායනා සේනානායක