මඟුල් පෝරුවේ රසවත් ඉතිහාස කතාව කියවන්න

චාරිත්‍ර වාරිත්‍ර ගැන ඔයා දන්නවද? චාරිත්‍ර කියලා කියන්නේ සිද්ධ කළ යුතු දේවල් වාරිත්‍ර කියන්නේ නොකළ යුතු දේවල්. ඉතින් මේ චාරිත්‍ර වාරිත්‍ර ගැන සැළකිලිමත් වෙන හොඳම අවස්ථාවක් තමයි විවාහය කියන්නේ. විවාහයක වැදගත් අවස්ථා කීපයක්ම තියෙනවා. ඒ අතරින් පෝරුව හා බැඳුන සිරිත් විරිත් ගැන වගේම පොරුව හා බැඳුන මිත්‍යා මත ගැන තමයි මම අද ඔයාට ලියන්න යන්නේ.

ඉතින් ඔයා දන්නවද කොහොමද මේ පෝරුව ආරම්භ වුනේ කියලා. පෝරුවේ චාරිත්‍ර කොතන කොයිවිදියට ආරම්භ වුනාද කියලා නිශ්චිත සාක්ෂි හම්බවෙන්නේ නෑ. ඒ හින්දා විවිධ අය මේ ගැන විවිධ මත පළ කරනවා. මහා සම්මත රජකාලේ ඉඳලා මේ පෝරුව පැවතගෙන එන බව සමහරුන්ගේ අදහසයි. මහා සම්මත රජු හා මැණික්පාලී කුමරිය අතර සිද්ද වෙච්ච විවාහ මංගල්‍යයට දස්කම් දිව්‍ය රාජයා විසින් කරපු නිර්මානයක් විදියටත් ඒ වගේම  පද්මාවතී කුමරිය බරණැස රජුට පාවා දුන් අවස්ථාවේ ඉඳලා මේ පෝරුව පැවත එන බවත් සඳහන් වෙනවා. තවත් මතයක කියවෙන විදියට සිද්ධාර්ථ යශෝදරා විවාහයේ පටන් මේ පෝරු චාරිත්‍ර ආරම්භ වුන බව පිළිගන්නා පිරිසකුත් අපි අතර ඉන්නවා. අලුත් යුවළට සෙත් ශාන්ති උදාකරන ක්‍රමයක් විදියට මේ පෝරුව චාරිත්‍ර හඳුන්වා දෙන්න පුළුවන්. පොළොවට මදක් ඉහළින් සකස් කරන පුවරුව පෝරුව ලෙස හඳුන්වන අතරේ, ගොවිතැනේදී පාවිච්චි කරන පෝරු ලෑල්ල මේ පෝරුව නිර්මාණයේදී පාවිච්චි කරන හින්දා මේ විදියට හඳුන්වනවා කියලත් කියවෙනවා.

ජීවිතයේ කෙනෙක්ට එක් වරක් විතරක් හිමිවෙන අවස්ථාවක් විදියට මේ පෝරුවට නැගීම හඳුන්වන්න පුළුවන්.  පෝරුවකට නගිනවා කියනවට වඩා ඒ ගැන බොහොම ගෞරවනීය විදියට අපේ පැරැන්නො කිව්වේ පෝරු මස්තකාරූඩ වෙනවා කියලයි. හැබැයි මේ පෝරුවට නැගීම අද වෙද්දී සමහරු විහිලුවක් බවට පත්කරගෙන තියෙනවා. දෙවෙනි තුන්වෙනි සැරේටත් පෝරුවට නගින ගැහැණු පිරිමි අද සමාජයේ අපිට අහන්න දනින්න ලැබෙනවා. මේක හරිද වැරදිද කියන එක නම් මම කියන්න දන්නේ නෑ. අද වෙද්දී විවිධ මල් වලින් සරසලා බල්බ් වැල් දාලා පෝරු නිර්මාණය කලත් අපේ සිරිත් විරිත් වල විදියට පෝරුවක් නිර්මාණය කළ යුතු ප්‍රමිතියක් තිබුණා. පෝරුවක් නිර්මාණය කරද්දී සැලකිලිමත් වෙන්න ඕනේ කරුණු තමයි මේ. පෝරුවේ හතර දිශාවට දොරටු 4ක් තියෙන්න ඕනේ. සතර දිශාවේ සතර වරම් දේව රූපත් , ඇත් හංස ලියවැල් පලාපෙති වගේ මෝස්තර වලින් අලංකාර වෙන්න ඕනේ. ඒ වගේම පෝරුවේ වියනේ රවි, චන්ද්‍ර, බුධ , ගුරු, ශක්‍ර, ශනි, රාහු, කේතු කියන නවග්‍රහ මණ්ඩලය ඇඳලා තියෙන්නත් ඕනේ.

තව දෙයක් තමයි පෝරුවේ සතර දිශාවෙන් පුන්කලස් 4ක් තියලා පහන් දැල්වීම කරන්න ඕනේ. සතරවරම් දෙවිවරුන් වෙනුවෙන් තමයි මේ විදියට පහන් දැල්වීම කරන්නේ. මනාලයා මනාලියගේ නිවසට ඇතුළු වෙන දොරටුවේ දකුණින් පිහිටන විදියට එදින ශුභ දිශාවට මුහුණලා තමයි මේ පෝරුව ඉදිකරන්න ඕනේ. සමාන්‍යයෙන් තවත් කෙනෙක් නැගපු පෝරුවකට අලුත් යුවලක් හොඳ නෑ කියලා විශ්වාසයක් අපේ පැරැන්නො අතරේ තිබිලා තියෙනවා. එතකොට වස් වදිනවනා කියලා තමයි  එයාලා කියන්නේ.
ශුභ නැකතින් ශුභ දිශාව බලලා පෝරුවට නැංවීම, අතපැන් වත්කිරීම, තැළිපිලි ඇන්දවීම, කැවුම් කිරිබත් කැවීම, හගල හුරුලු මාරු කිරීම, කිරිකඩ හේලය පිදීම, ජයමංගල ගාථා හා අෂ්ඨක කීම මේ සිරිත් විරිත් අතර ප්‍රධාන වෙනවා. මේ චාරිත්‍ර අතරින් පළමු චාරිත්‍රය වෙන්නේ පෝරුවට නැංවීමයි. පෝරුවට නංවන්න කලින් මනාලයාගේ වම් පසින් මනාලිය සිටවලා ත්‍රිවිධ රත්නයට ගාථා කීම සහ දේවාරධනා කිරීම සිද්ධ වෙනවා. ඊට පස්සේ සෙත් පිරිත් ගාථා මධ්‍යයේ මනාලයා සහ මනාලියගේ මාමාවරු දෙන්නෙක් මේ යුවළ පෝරුවට නැග්ගවීම සිද්ධ කරනවා. අතපැන් වත්කිරීම කියන චාරිත්‍රය අහලා දැකලා ඇතිනේ. මේ අතපැන් වත්කිරීමේ චාරිත්‍රය වෙස්සන්තර රජු දරුවන් දන්දීමේ අවස්ථාව දක්වා ඈත අතීතයට දිවෙන චාරිත්‍රයක්. මනාලිය සරණ පාවා දීමේදී අත්පැන් වක්කිරීම ඇතැම්විට මාමාවරුන්ට පැවැරෙන රාජකාරියක් වුනත් මනාලියගේ පියා මෙය කරනවා නම් තමයි හොඳ සහ සුභ වෙන්නේ. තමා සතු දෙයක් අන් අයෙක් ට පැවරීම තමයි මේ අත්පැන් වත් කිරීමෙන් සංකේතවත් වෙන්නේ. එතකොට තැළි පිළි පැළඳවීම කියන චාරිත්‍රය මගින් තමන්ට හැකි පමණින් ආභරණ හා ඇඳුම් ලබාදෙන බවට පොරොන්දු වෙනවා.

හගල හුරුලු දීම මීළඟ චාරිත්‍රයයි. දෙදෙනා අතරේ බුලත් හුරුලු හුවමාරු කිරීම මෙහිදී සිද්ධ වෙයි. මෙහිදී බුලත් හුරුලු 7ක් සැමියා විසින් බිරිඳ අතට ලබා දෙයි. මින් හඟවන්නේ සැමියා උපයන දේ නොසඟවා බිරිඳට බාරදීමයි.  එහිදී බිරිඳ සැමියාට නැවතත් බුලත් හුරුලු 6ක් ලබා දෙයි. ඉන් හඟවන්නේ තමාට ලබා දුන් මුදලින් කොටස් 6ක් නැවත සැමියාට ලබා දීමයි. මේ මුදල් ලබා දෙන්නේ මව්පියන්, ගුරුවරුන් , දරුපරපුර, ආගමට , යහළුවන්, සේවකයන් කියන සය කොටසට යුතුකම් ඉටු කිරිමටයි. 7 වෙනි බුලත් හුරුල්ල යලි නොදෙන්නේ. ඒ මුදල් කොටස දෙදෙනාගේ අනාගතය වෙනුවෙන් ඉතිරි කිරීමට යොදවන නිසායි. කිරිකඩ හේලය පිළිගැන්වීම පෝරුව චාරිත්‍ර වලදී කෙරෙන තවත් චාරිත්‍රයකි. මෙය මව් ගුණය සිහිකරමින් මනමාලියගේ දයාබර මවට කෙරෙන උතුම් පරිත්‍යාඅග්යකි. ඉතින් මෙවන් වූ සිරිත් විරිත් ගොන්නක් හා බැඳුනු මංගල පෝරුව සම්බන්ධ කටයුතු නිවැරදි අවබෝධයෙන් කිරීම වඩාත් වැදගත් වේ.
පරණ දේවල් ගැන රහට කතා කරන තවත් සටහනකින් හමුවෙමු.

ඖෂංගි ගායනා සේනානායක