අත බලා සාස්තර කීමේ ඉතිහාසය සොයා ගියෙමි.

“සාස්තර” මේ කියන වචනේ අහපු ගමන්ම හුඟ දෙනෙක්ගේ හිතට එන්නේ “ඕවා බොරු කතා” කියන අදහස. ඔය පාරවල් ගානේ හන්දි ගානේ පන්සල් දේවාල ගානේ ඉන්න අහිකුන්ඨික කාන්තාවෝ නම් 100% ක්ම වගේ කියන්නේ අමූලික බොරු තමයි. ඒත් අපිට එතනින් නැවතිලා මේක බොරුවක් කියන්න බෑනේ. මොකද කාලයක් තිස්සේ පවතින්න නම් මෙතන මොනම හරි දෙයක් තියෙන්න ඕනේ.

“අත බලා සාස්තර කීම” එහෙම නැත්නම් බර වචනෙන් කියනවා නම් හස්ත රේඛා ශාස්ත්‍රය ගැන අපි මොනවද දන්නේ? ඉතින් මට හිතුනා පොඩ්ඩක් මේ ගැන හොයලා බලන්න ඕනේ කියලා. පත්තර පොත් ඇතුලේ, අන්තර්ජාලය ඇතුලේ මේ ගැන යහමින් කරුණු ටිකක් හොයාගන්න මට පුළුවන් වුනා කියලා මට හිතෙනවා.

ඔයා හිතන්නේ මේ අත බලා සාස්තර කියන්නේ ආසියානු රටවල විතරයි කියලද? නෑ එහෙම නෑ. කොහොම වුනත් හස්ත රේඛා විද්‍යාව ආරම්භ වෙලා තියෙන්නේ ඉන්දියාවේ. එතනින් චීනයටත් චීනයෙන් ඊජිප්තුවටත් ඊජිප්තුවෙන් ග්‍රීසියටත් ග්‍රීසියෙන් යුරෝපයටත් ව්‍යාප්ත වුනා කියලා තමයි දැනගන්න ලැබුනේ.

යුරෝපය ඇතුලේ මේ හස්ත රේඛා ශාස්ත්‍රය වැඩියෙන්ම ජනප්‍රිය වෙන්න හේතුවුන එක පුද්ගලයෙක් ඉඳලා තියෙනවා. ඔහුව එක එක තැන්වල විවිධ නම් වලින් හඳුන්වලා තියෙනවා. William John Warner එහෙම නැතිනම් cheiro මෙන්න මේ පුද්ගලයා ප්‍රසිද්ධ චරිත වල අත බලලා කියපු විශ්මිත අනාවැකිය හින්දා තමයි යුරෝපය පුරා මේ ගැන කතා වෙන්න පටන් අරන් තියෙන්නේ. ඔහු ගැන හොඳ විස්තරයක් Wikipedia ඒකෙන් ඔයාට කියවන්න පුළුවන්. 

කොහොමින් කොහොම හරි මේ අත බලා සාස්තර කියන එක ආරම්භ වෙලා තියෙන්නේ ඉන්දියාවේ. ඒ කොහොමද කියලා ඔයාට හිතුනේ නැද්ද? ඒ ආරම්භය ගැන හොයාගෙන යද්දී මට මෙන්න මේ වගේ කරුණු ටිකක් තමයි කියවන්න ලැබුනේ.

අත බලා සාස්තර කීම , හස්ත රේඛා ශාස්ත්‍රය ඔතනින් තව ටිකක් එහාට ගියාම මේ ශාස්ත්‍රය හඳුන්වන නිවැරදි ක්‍රමය තමයි “ සාමුද්‍රික ශාස්ත්‍රය” කියලා කියන්නේ. “සමුද්‍ර” නම් වුන සෘෂි වරයෙක් මේ ශාස්ත්‍රය ලොවට දායාද කරපු හින්දා තමයි මේ නම ලැබිලා තියෙන්නේ. ඒ වගේම ඈත අතීතයේදී “පාර්වතී” දෙවියන්ගෙන් නන්දි දිව්‍ය රාජයාටත් ඔහුගෙන් කමලමුණි නම් සෘෂි වරයාටත්, ඔහුගෙන් මච්චකෙන්ද සෘෂි වරයාටත් මේ ශාස්ත්‍රය ලැබුණු බව තමයි පොත් පත්වල ලියවිලා තියෙන්නේ. එහෙම බැලුවම මේක කොයිතරම් පරණ ශාස්ත්‍රයක් ද කියලා ඔයාට තේරෙනවනේ නේද?

මේ ඉපැරණි ශාස්ත්‍රය ගැන දැනුම් තේරුම් නැති අය කියන සාස්තර නිසා මේ ගැන බොහෝ දෙනෙක් ගේ සැලකිල්ල අඩුවෙලා තියෙනවා. අපි කළලයක්ව හිටිය කාලේ අත්ල තදින් මිරිකා ගෙන හිටිය නිසා ඇතිවූ රේඛා වලින් පුද්ගලයෙකුගේ ජීවිතය ගැන විස්තර කරන්න පුළුවන් ද කියන කාරණේ නම් ගැටළුවක් වුනත් මෙහි යම් ඇත්තක් වුනත් තියෙන්න පුළුවන් කියලයි මටනම් හිතෙන්නේ. මොකද අපේ අත්ල අපිට අනන්‍යතා සහතිකයක්. නිවුන්නු අතර වුනත් අත්ලේ අසමානතා රැසක් පිහිටලා තියෙනවා, ඒ හින්දනේ අපි finger prints පාවිච්චි කරන්නේ. කෙනෙක් ගේ අත්ල කියන්නේ ඔහුගේ හෝ ඇයගේ පෞද්ගලිකත්වයයි.

මේ ගැන බෞද්ධ සාහිත්‍යයට සම්බන්ධ කරලා බැලුවොත් අපිට මේ ශාස්ත්‍රය ඇත්තක් බවට පිළිගන්න සිදුවෙනවා. ඔයා දන්නවා නේද අපේ සිදුහත් කුමාරයාගේ නම් තැබීමේ උත්සවයට අංග ලක්ෂණ බලලා අනාවැකි කියන බමුණන් 108 දෙනෙක් කැඳෙව්වා කියලා ඒ වගේම ඒ අයගෙන් 107 දෙනෙක්ම කුමාරයා සක්විති රජ කෙනෙක් හෝ බුදුවරයෙක් වෙන බව අනාවැකි කිව්වා කියලා. ඒ වගේම එතන හිටිය ලාබාලම බමුණු පඬිවරයා කොන්ඩඤඤ කුමරු අනිවාර්යයෙන්ම බුදු වෙන බව පැවසු බව අපේ බෞද්ධ සාහිත්‍ය තුල කියවෙනවා නේද? එය බොරුවක් නෙමෙයි නම් මේ ශාස්ත්‍රයත් බොරුවක් වෙන්න බෑ නේද?

භාරත දේශයෙන් පටන් අරගෙන චීනයට, පර්සියාවට, අරාබියට,  ග්‍රීසියට හා රෝමයට මෙන්ම  14 වැනි හා 15 වැනි ශත වර්ෂ අතර කාලයේදී හස්ත රේඛා ශාස්ත්‍රය ඉතාලිය, ජර්මනිය, ප්‍රංශය, එංගලන්තය වැනි රටවලට පැතිර යනවාත් එක්කම  එහිදී එක්තරා වැදගත් දියුණුවක් හස්ත රේඛා ශාස්ත්‍රයට ඇතිවීමට පටන්ගෙන තියෙනවා. නමුත් හස්ත රේඛා ශාස්ත්‍රය හා ජ්‍යෝතිෂ්‍යය ශාස්ත්‍රය ක්‍රිස්තියානි පූජකයන්ගේ බලපෑම් නිසා කලකදී තහනම් වෙලා තියෙනවා.. ජ්‍යෝතිෂ්‍යය ශාස්ත්‍රය, හස්ත රේඛා ශාස්ත්‍රය, භූත විද්‍යාව ප්‍රගුණ කළ දහස් දෙනා එම කාලයේදී මරුමුවට පත් කරලා තියෙනවා.. එංගලන්තයේ 1 වැනි එළිසෙබත්ගේ ඉඳලා  2 වැනි ජෝර්ජ් රජ කාලය 1558 – 1770 වෙනකන්ම  මේ තහනම තිබුණු බව ඉතිහාසයේ ලියවිලා තියෙනවා.

ඉතින් ඔය විදියට ප්‍රහාරයට ගොදුරු වෙච්ච  හස්ත රේඛා ශාස්ත්‍රය ආයෙමත් නැගිටින්නේ  19 වැනි සියවසයේදී. නූතන හස්ත රේඛා ශාස්ත්‍රඥයන්ගේ අසීමිත ගවේෂණ හින්දා  මෙම හස්ත රේඛා ශාස්ත්‍රය විද්‍යාත්මක මුහුණුවරක හුඟක් සමීප වෙලා තියෙනවා. ශ්‍රී  ලංකාවේත් හස්ත රේඛා ශාස්ත්‍රය ඉතාමත් දියුණු අවධියක තිබුණු බව  අවුරුදු 3000කට වඩා පැරැණි ශාස්ත්‍රීය ග්‍රන්ථවල පිටපත් වල සඳහන් වෙලා තියෙනවා.  ඒ වගේම  ශ්‍රී  ලංකා තෙද බල ඇති රාවණා රජු පවා නොයෙක් හස්ත ශාස්ත්‍ර හා හස්ත රේඛා ශාස්ත්‍රය දැනන් හිටියා කියල  වීදාගම ස්ථවිරයන්ගේ “එළු අත්තනගලු වංශය” පවා ලියවිලා තියෙනවා.

නවීන විද්‍යාවේ දියුණුවත් එක්ක මිත්‍යා විශ්වාස , ඇදහිලි විදියට සලකා අපෙන් දුරස් වූ දේවල් අපමණයි. නමුත් නවීන තාක්ෂණයත් එක්ක විටෙක ගැටෙමින් තවත් විටෙක නවීන තාක්ෂණය පරයමින් නවීන තාක්ෂනය තුල වුවත් දියුණු වෙමින් තවමත් ඉදිරියට යන ශාස්ත්‍රයක් බවට පත්වෙන්න හස්ත රේඛා ශාස්ත්‍රයට හැකියාව ලැබී ඇත්තේ මෙහි ඇති සත්‍යතාව නිසාම වන්නටත් පුළුවන්.

ඖෂංගි ගායනා සේනානායක.